Wednesday 4 August 2010

ما تبس بقى

عارفين لما السياح يقفوا يتصوروا في الشارع يقوم ييجي بياع الترمس يقف وراهم ويشاور للكاميرا ويقف وياخد بوز التصوير ويتصور بغلاسة شديدة وهو اصلا ماشي ومش حيشوف الصورة بعد كده؟ اهو الاعلام المصري عمل كده
النهاردة على التويتر وانا باتفرج على العظمة على عظمة اللي عملها كل من الجيش اللبناني والمقاومة اللبنانية
سواء تصدي الجيش اللبناني، او تعقل المقاومة
عرفت ان برنس الليالي عمل كام مكالمة تليفونية، قلت لهم: مش عارفة ليه حاسة ان الجمهورية حتقول لولا الضغط المصري كانت لبنان راحت في داهية.. قلبي بيقول لي كده
وقلت لهم بصراحة احنا لو عملوا كده سوف نذوب خجلا لو عملوا حاجة زي كده
بس كنت باقول يا احساس كداب، وقعدنا نتريق وواحد قال: لولا حنكة الرئيس لقطعوا الشجرة قلت له والنجيلة والنخلة اللي جنبها كمان على اساس ان دي حاجة مش ممكن تحصل
قوووووم الجمهورية بنفسها وذات نفسها تطلع تقول ايه؟
ده غير راديو مصر اللي طلع يقول: جهود حثيثة مصرية لاحتواء الازمة في جنوب لبنان
لا.. لا لا لا لا لا لا .. عيب كده بقى، ما تبس بقى تهزيء فينا، الناس تقول علينا ايه؟ مش كفاية بعد كل اللي عملتوه الناس بقت خلاص تتعامل معانا على اننا ناس مجانين رسمي وبشهادة وبقوا يكلمونا زي عم مدبولي ما كان بيكلم قناوي؟ طلعتونا مجانين قدام العالم ودلوقت بتطلعونا جرابيع
لا انا كرامتي واجعاني قوي على فكرة.. ده بجد
احترموا نفسكوا لو مش حتحرمونا.. ازمة ايه اللي كانت في جنوب لبنان، ده اسرائيل دخلت تتسحب اتلسعت كام قفا وطلعت تبرطع جتكوا خيبة يا وكسة لازم تحرجونا وتقولوا كلام مالوش لازمة؟ لولا ازازة البيبسي اللي عزمنا عليهم بيها كان ريقهم نشف وما عرفوش يكملوا لسع في اسرائيل
ما بقاش عتهكم يضحك

6 comments:

احمد خليل said...

صباح الخير يا ست الكل،من احدى مميزات تعليقاتك انها طازجه جدا وسريعه، حاضره دائما ،بنلاقيها دائما اما نحتاجها،تمنياتى

Bella said...

هههههههههه

يخرب مخك يانوارة

انا لما قريت حكاية تضامن مصر دي وقعت على روحي م الضوحك وقلت يعني ح نبعت للبنان جيشنا يساعدهم في الحرب ولا ايه يعني

ولا يكونش ابو الغيط ناوي يشخط في الصهاينة ويقول بس ياعدو منك له فيرتجع الجيش الاسرائيلي ويقد على جنب يظبط نفسه

ههههههههههههههههههههههههههههههههه

بقينا مسخرة وسط الامم

الميكروباص said...

لم أعد أفهم ماذا يريد الناس
ايه المشكله لما كام عسكري لبناني تصدوا لليهود؟
أليس هذا هو الطبيعي والمنطقي؟
يعني هو المفروض ايه اللي يحصل مثلا؟
ان لبنان تنضرب ويتمسح بها التراب؟
يا اخوانا اللي حصل ان شيء أقل من العادي
ناس دخلوا يقطعوا شجره فتصدى لهم القوات اللبنانيه وان شاء الله ربنا يوفقهم في المستقبل ويتصدوا للطائرات اليهوديه التي تنتهك الحدود بالدفاع الجوي

وبعدين مفيش داعي كل لما نشوف واحد او أي حد عمل حاجه في بلد تانيه نطلع نشتم في بلدنا
القصه حدثت بالامس والموضوع انتهى
وعلى فكره- مفيش حد قال ان مصر عملت ضغط على احد
وبعدين سوريا قالت اننا نقف بجانب لبنان وندعمها
ونفس الكلام قاله ابو الغيط
وهللتم لإيران وقطر وحزب الله عندما قالوا اننا ندعم غزه ولم يفعلوا شيء وساعتها قال الناس "يا سلام على المواقف الجباره"
فلماذا الهجوم على مصر عندما تقول انها تدعم لبنان في هذا الموقف؟
ياما ناس اتكلمت ولم يفعلوا شيء غير الكلام ووجدنا من سيادتك اشاده
ولا لما احنا نيجي نعمل زي باقي الناس نطلع غلطانين؟

ola said...

لورنس أوف إرابيا ده غريب قوي
ههههههههههههههه
بيعلق بنفس الإسم كمان بنفس الغباء في حتت كتير
لسة من دقيقة قريت تعليقه على مقال عبدالباري عطوان في القدس العربي
آجي آلاقيه لاطخ نفس التعليئ هنا هههههههههههه

الدرويش المرووش said...

الجمهورية دى هى و اﻷخبار
المفروض وزارة الصحه تحط عليها تحذير

ممنوع لمرضى القلب و الضغط و الحوامل

خسارة إنهم إخترعوا ورق التواليت

Anonymous said...

من زمان واسرائيل على لسان اناس كثر من اسرائيل مثل ايهود باراك وتهديداتة المتكررة لستهداف لبنان وموسساتة ..جاء مايشبة الرد تهديد لبنان وموسساتة ليس لعبة وعلى ايهود باراك وغيره مضغ وبلع كلامة.