Monday 21 November 2011

بيان هام اخر خمسة وسبعين حاجة

 تحديث:
البيان صاغه مالك عدلي وباسم.. بس الاجتماع كان فيه ناس كتير قوي ووافقنا كلنا بالاجماع عليه
---------
امبارح اجتمعنا مجموعة كبيرة واتفقنا على بنود المطالب
المطالب مش نكتة ولا كيميا ولا حاجة... المطلب ان العسكر لازم يمشي... طبعا الاخوة ابناء مصر هبة الاستقرار قعدوا يقولوا لنا امال مين ييجي... الصراحة انا مش فاهمة يعني ايه امال مين ييجي دي لما تتقال على العسكر!!!!!!!!!! يعني كانوا بيقولوا على مبارك: ماهو لو مشي ايه البديل؟ على اساس ان الراجل عشرة ووعيوا على الدنيا ما لقوش غيره فمش عارفين يتخيلوا حد غيره رئيس... انما ولاد امبارح دول كمان اخدتوا عليهم زي الطير ما اتعود عشه اتعودت عليك يا حبيبي؟ هم دول كمان حيعملوا فراخ دستوري؟ مش ناقص غير يقولوا لنا المجلس العسكري الاب
المفروض ان الحكم العسكري ده وضع استثنائي.. وبعد ما قتل لنا اكتر من 22 شهيد في يوم واحد ما بقاش نافع يقعد ولا ثانية، وسؤال مين ييجي ده سؤال استفزازي قال يعني هم ممشيين البلد... ايش حال ان ما كنتوش عمالين تشتكوا من وقف الحال وتقولوا الثورة.. هي الثورة بتحكم البلد؟ اللي حاكم البلد هو اللي واقف حالها، ولما كنا قاعدين بطولنا التمنتاشر يوم البلد كانت ماشية زي الفل
لكن ما علينا... بما ان مصر هبة الاستقرار، وانا مقدرة برضه انها اقدم دولة في التاريخ والناس مش عارفة تتخيل ازاي يعني الناس الكبارة تمشي.. تمشي تروح فين؟ خلاص من مييييين؟  بلاش السلوجان ده
وبما ان الناس مدمنة مؤسسات، وآخر عامود في الخيمة والكلام الفارغ ده، فاحنا اتفقنا على اننا نقترح حلول ما تعملش خلافات بين الناس، يعني بدل ما نقترح اسماء اشخاص وكل شوية حد يطلع لنا زي الخازوق ويقول لنا: البرادعي لأ... ابو اسماعيل لأ... ابو الفتوح؟ دي مؤامرة اخوانجية... ننقل السلطة الانتقامية من مؤسسة الجيش الى مؤسسة القضاء
طبعا برضه انا مقدرة ان الناس في الميدان قلبها محروق.. وحيبقى عندها تحفظات على حاجات كتير، زي ان نفسهم المجلس يتحاكم ويتعلق من رموشه بعد ما حرق قلوبنا كلنا، زي انهم شايفين زي ما انا شايفة ان مؤسسة القضاء مؤسسة فاسدة زيها زي مؤسسة الجيش.. بس نيجي على نفسنا يا شباب.. عادي بقى، ما احنا ناكل العلق ونقعد نحايل في اللي قاعدين في بيوتهم.. عشان اللي قاعدين في بيوتهم خايفين.. اه... اللي واقفين قدام الرصاص الحي مش خايفين وهم اللي قاعدين يحايلوا في اللي قاعد تحت البطانية ويطمنوه.. هي مصر كده.. ام العجايب، زي ما هي البلد الوحيدة اللي الاغنيا فيهم هم اللي عندهم حقد طبقي على الفقرا والفقرا ما عندهمش اي حقد ويقعدوا يقولوا: ربنا يزيده ويرزقه.. نصيبنا بقى.. اجيب لكم شعب منين؟ استورد؟ ولا حنرميهم يعني؟ 
 احنا مضطرين ننقل السلطة الانتقالية الى مؤسسة في الدولة عشان ما يقعدوش ياكلوا دماغنا ويقولوا لنا بتهدوا الدولة بتهدوا الدولة كأننا بنهد الهرم.. اصلا ربنا عامل لنا معجزة في الهرم الاكبر لها رمزية كبيرة:
الهرم الاكبر قمته عليها خازوق.. سبحان الله، فعلا قمة الهرم في مصر عبارة عن خازوق.. اكبر خازوق في حياتنا.. قمة الهرم في كل حاجة وكل مؤسسة وكل تنظيم... بس الناس بتحب الهرم.. خلاص... نحايل الناس وناخدها على قد عقلها بس نخلص من المقتلة المستمرة دي
اه طبعا مؤسسة القضاء مش حتفرق عن مؤسسة الجيش من حيث الفساد، بس اولا: مش حتحاكمنا عسكريا، ثانيا: لما ننزل نتظاهر ضدهم مش حينزلوا لنا شرطة عسكرية ولا حيدهسونا بمدرعات مرتبكة، يدوبك حينزلوا لنا الداخلية تقتلنا ودول بنعرف نبهدلهم. ثالثا: الاقتراح ده مطابق للاستفتاء اللي الناس قالت عليه نعم، اللي اخل بالاستفتاء وغير ارادة الشعب هو المجلس العسكري، لكن الشعب قال نعم على التعديلات الدستورية، التعديلات الدستورية لدستور 71.. مش الناس قالت له نعم؟ خلاص.. بينا وبينكم الورق والاستفتاء وختم النسر يا اقدم دولة في التاريخ.. مبسوطين كده؟ جبنا لكم ختم نسر ومؤسسة اهو. رابعا: القضاء حيبقى قدامه فرصة بحد اقصى 60 يوم مش حيقعد يقول لنا احنا مش حنقعد اكتر من ست عشر تلاتين شهر سنة قرن كده.. يدوبك مسافة السكة.. خامسا: لو مرمطناهم ماحدش حيقول لنا خط احمر وعايزين تهدوا البلد واسرائيل حتهجم علينا وفنزويلا حتحتل شبرا والكلام ده.. الجيش يرجع يحمي الحدود.... هأ.. قال يحمي قال.. يا ريتنا ما شفناكم ولا عرفنا حالكم المنيل.. يا ريتنا قعدنا عليكم ساعة ما خلفناكم.. هييييه... يالا... نصيبنا... المهم يعني.. اعتبروهم راحوا يحموها.. المهم نغورهم من وشنا والنبي.. انا ما بقتش مستحملة خلقة ميري تاني.. الشرطة احنا نعرف نتصرف معاها... المهم الجيش بشرطته العسكرية بمحاكمه العسكرية بخطه الاحمر بصابرين صابرين صابرين بسلاطاته ببابا غنوجه يغور من وش امنا بقى.. ونستعد للفل الجديد
بالنسبة لاقتراح حكومة انقاذ وطني... ده عند امه يا ادهم.. دي حكومة انقاذ العسكر مش حكومة انقاذ وطني، حنغير شرف ونجيب البرادعي ولا نجيب ملاك منزل من السما برضه هو تحت حكم العسكر والمسدس على راسنا وراسه.. مافيش الكلام ده.. الكلام ده فارغ.. فارغ وقلة ادب.. قلة ادب.. ده استعباط.. استعباط زي استعباط مبارك لما عين عمر سليمان نائب واقال الحكومة كأن المشكلة كانت في ان مالوش نائب وان الحكومة دي هي اللي وحشة.. احنا بنهزر معاكم؟ بنهزر معاكم؟ 
ينعل ابو عبده مشتاق اللي عايزين اي منصب دول.. وانتوا خاسس عليكم حاجة؟ حد بيموت لكم؟ حد بيتخزق له عين من اعز الحبايب لكم؟ من انتم؟ من انتم؟
باقولكم ايه... انتوا مش عبده مشتاق؟ استنوا لما الانتخابات الرئاسية تتعمل عشان تشتاقوا براحتكم
الانتخابات البرلمانية تتعمل في معادها... عشان الاخوان ما يزعلوش.. قال يعني حتفرق في حاجة انتخابات من عدمها طول ما احنا تحت حكم عسكري.. بس معلش.. ناخدهم على عقلهم عشان ما نزعلهمش
حاجة تانية مهم قوي: عفا الله عما سلف.... شششششششششششششششش شت شت شت... بااااااااس... ما تشدش في شعرك ياللي في التحرير.. انت عايز المصلحة ولا عايز تقعد تغل في نفسك؟ لو كنت عايز حاجة تانية غير المصلحة ما كنتش بهدلت نفسك كده
خلاص.. يبقى المصلحة اهم.. المصلحة المشتركة دلوقت ان العسكر يمشي.. وده مش حيمشي الا كلنا نتجمع ونتغاضى عن خلافتنا، لا نقعد بقى نلوم في الاخوان، ولا نقعد نأنب في اللي استندلوا في احداث ماسبيرو ونفكرهم بسكوتهم وقتها، ولا نسلخ في حازم ابو اسماعيل عشان خلع من الاعتصام يوم 18 نوفمبر ونقول للبرادعي انت جيت شهقة يا رمضان ولا اي حاجة من دي.. خلاص.. عفا الله عما سلف.. ولو مؤقتا، لحد ما نخلص من العسكر
عايزين نطمن كل الناس اللي خايفة تنزل الميدان لتاخد بالجزم القديمة والشباشب المتعاصة في الكنيف ان جزمنا في رجلينا وشباشبنا مش حنعوصها في الكنيف.. انزلوا بكامل طاقتهم وما تخافوش.. وما تعملوش فينا مقالب عشان خايفين منا.. عفا الله عما سلف.. مش حنضرب حد، المصلحة الواحدة دلوقت ان الحكم العسكري ينتهي فورا.. فورا فورا
وده البيان المقترح اللي عملته المجموعة وبيتوزع دلوقت في الميدان عشان ناخد بيه موافقات من الناس اللي عمال تتعجن من يوم 18 بالليل دي... معلش سامحوني يعني.. هم اولى ناس يبقى لهم الكلمة الاولى وبعدين اي حد غيرهم ييجي بعدهم.. ده كفاية ان المصابين اتصابوا تاني
البيان:
من أجل الخروج من الأزمة التى تمر بها البلاد والجدل الدائر بين جميع القوى السياسية وغضب الشارع المصاحب له نعلن نحن المعتصمين بميدان التحرير عن رفضنا لسياسة العنف فى التعامل مع مطالب الشارع واحتجاجاته وتناسي ما وافقت عليه جموع الشعب المصري حول محتوى الإستفتاء الدستوري بتاريخ 19 مارس 2011 ونعلن عن خطة مقترحة للخروج من الأزمة تعبر عن مطالبنا وندعو جميع المعتصمين بميادين مصر لدعمها وكذا القوى السياسية وجماهير الشعب المصري وبنود الخطة المقترحة كالأتى 
أولا: ان يقوم المجلس العسكري بالعودة إلى ثكناته والتفرغ لادارة شئون الجيش وتسليم كافة سلطاته إلى مجلس مشكل من رؤساء الهيئات القضائية وهى رئيس المحكمة الدستورية العليا و رئيس المجلس الأعلى للقضاء ورئيس مجلس الدولة لتولى إدارة شئون البلاد فى المرحلة الحالية التى تنتهى بنهاية شهر إبريل2012 
ثانيا: يكون هذا المجلس مسئولا عن اجراء الإنتخابات البرلمانية فى موعدها على ان يعقبها الإنتخابات الرئاسية مباشرة 
ثالثا: يتولى البرلمان المنتخب تشكيل جمعية تأسيسية تعد دستورا جديدا للبلاد بالتزامن مع إجراء الإنتخابات الرئاسية ليقوم الرئيس المنتخب بطرح الدستور الجديد على الشعب فى إستفتاء عام 
رابعا: يتولى المجلس المشكل من رؤوس الهيئات القضائية تشكيل حكومة إنقاذ وطنى تطهر وزارتي الداخلية والاعلام وتعمل على حل المشكلة الأمنية والإقتصادية فى البلاد.
خامسا: إلغاء كافة أشكال المحاكمات العسكرية للمدنيين وإحالة جميع المتهمين أمام القضاء العسكرى والمحكوم عليهم إلى قضاء مدنى مختص لإعادة محاكمته.
شيروه.. وخدوا عليه موافقات
واحنا حناخد عليه موافقات في الميدان ونشوف.. الكلمة الاخيرة للميدان برضه.. معلش يعني... عدم اللامؤاغزة.. 
احنا كمان بنجمع عليه توقيعات من شخصيات عامة، وفيه ناس كتير موافقة عليه
سؤال بقى:
22 شهيد... الميدان مش مليونية ليه؟ 
كلمة وقلتها ايام ماسبيرو وباعيدها تاني: اللي يرضاها للناس او يسكت عليها... يشوفها، يشوفها.. مش دعا على حد.. ده تقرير واقع.. عدل ربنا كده، وقلت لكم لو فلتوا بعملتهم في ماسبيرو مش حيكبروا لحد... ولو فلتوا بعملتهم في ماسبيرو ربنا مش حيسيبنا
ابدا... ماحدش سمع الكلام.. خليكم بقى.. انا خالية ذمتي امام الله الحمد لله
والعسكر حيمشي.. العسكر حيمشي.. المجلس العسكري كله قصاد شعراية من مالك مصطفى عندي.. حرقوا قلبي
حرقوا قلبي

17 comments:

بإيدك يامصر said...

تعوضنا هذه القفزة عن الخروج من الميدان يوم 11 فبراير بدون تشكيل مجلس للثورة ، رغم كل التحفظات على كون معظم قيادات القضاء من مخلفات المخلوع .
ولا يمكن العودة الى نقطة ما قبل 19 نوفمبر بدون اقصاء اذناب المخلوع ، الآن اكثر من 10 محافظات تثور مع التحرير في نفس الوقت . ولا نريد ، لا نريد لا نريد أن نخرج مرة أخرى بغير اقصاء اذناب المخلوع .
يجب الاتفاق على ذلك . الآن قبل الخروج من الميدان مع دراسة دور وحدود باقي المخلفات .

KaRieMo said...

ربنا ينتقم منهم
دعاء دايما على لسانى
يارب ياطنطاوى انت ومجلس القلل بتاعك وحكومه شرف
الوسخه الهى يارب تشوفوا عيالكم بتموت قدام عنيكم
وتعيشوا بحسرتهم بقية حياتكم
قادر ياكريم

محمد نبيل said...

أنا محتار وكمان بعترف ان وعيي السياسى على قده بس شايف ان القضاء الفاسد حينسق مع العسكر ويأتمر بأمرهم وحيستعينوا بالشرطة العسكرية والجيش وكل حاجة.

بإيدك يامصر said...

الاخوان نازلين عشان يبقى فيه حد يتفاوض من الميدان زي المرة اللي فاتت في فبراير ،الاول الكلام العنتريات وبعد كده هم العاقلين المثقفين ، وبعد كده طيب ما نسمعهم ، وبعد كده احنا بنشوف بيقولوا ايه ويبدأ التفاوض ، وبعد كده عمكوا الاستقرار .

nonna said...

و بعدين يا ست البنات؟؟؟ مجلس قضاء ايه؟؟؟ احنا اتعقدنا من المجالس خلاص... ما هو القضاء ده اللي مشارك دلوقتي في قتل الناس بتقاعصه عن محاكمة ضباط الشرطة المجرمين و اللي حرضوهم.... طب ما يفتحوا باب الترشيح لانتخابات الرياسة تاني يوم انتخابات البرلمان.... أو ممكن البرلمان يعمل لنا دستور فيه دولة برلمانية و بلاها رؤساء خالص... نبقي ننتخب واحد شرفي براحتنا.... زي انجلترا و اسرائيل.... و الوزارة تتشكل من الأغلبية البرلمانية حتى لو إخوان... مش أحسن من مجلس القضاء ده

مش فاهمه said...

بصى يا نوارة ...انتى فى الأزمات لما بتحكمى عاطفتك بتودينا فى داهيه و المدونه بتاعتك تشهد على حبك زمان للعسكر و مغازلتك ليهم و جواباتك لهم لسه حبرها مانشفش و ياما قولنا لك و بعدهم البسطويسى و طلع مقلب ممكن نفكر بعقل شويه يا نونو .....بلييييييييييييز

المواطن مصري said...

طب السؤال اللي بيطرح نفسه هنا و بشدة: الشعب كله وافق على البيان و المطالب
ايه موقف المجلس من الحكاية دي؟ يعني هل بالسهولة دي هناخده من ايده و نوديه ثكناته؟!
الفكرة هنا مش الخوف من المجلس او عمل اعتبار ليه و لكن...
المجلس هو درع حمايةلنفسه و لمبارك و عيلته و حاشيته
وهما ماسكين السلطة هيسيبوها بالساهل كدة؟ طب بذمتك لو رميتي للكلب عضمة هتعرفي تاخديها منه تاني؟!

الحقيقة الغرض من سؤالي مش اننا ازاي هنقنع المجلس بالمطالب لكن اننا نوصل للمجلس ان المطالب دي مفيهاش خطورة عليه , مش خوف منه ولا عشان سواد عيون امه لكن عشان المجلس لو حجر دماغه هتبقى مدبحة و انا قاعد في الغربة لوحدي ربنا العالم بحالي و بضغطي
انا خايف ع الناس مش اكتر
فرجائي الوحيد انكم تاخدوا النقطة دي في الحسبان كنوع من انواع الحنكة السياسية لأن الاعتماد على القوة و الضغط بس بيسيح دم كتير
و ربنا معاكم و يثبتكم و ينصركم
قلبي و روحي معاكم

masteregyptx said...

اولا نفسي اعرف انا تعليقاتي مش بتنشر ليه؟ و ثانيا لي سوءال و هو هل لو مجلس العسكر ده مشي حعرف ساعتها اخد حقي من لواء الجيش اللي بقاله سنين بيبلطج عليا؟ نفسي حد يرد عليا.

Hesham Mehrem said...

نوارة .....لكم تمنيت أن تكون لي إبنة مثلك
ولدي معكم في التحرير ...لا أعزه علي وطني ...ويعلم الله أنه لولا وجودي خارج مصر لكنت بينكم..أتعلم منكم ما فشل جيلي في تحقيقه وأزيد من في التحرير (نفر)

مصرى مفقوع said...

يا ريت كمان نشوف بتوع شباب ماسبيرو بسيسيبوا الصلبان فى البيت و يهزوا طولهم و يبطلوا ندالة لما رفضوا ينزلوا 18 نوفمبر. والا هما بس بينزلوا عشان كنيسة مزيفة اتهدت و مش مهم البلد كلها تتهد. يا ريت البابا شنودة ما يعملش زى 25 يناير لما منعهم من النزول. عفا الله عما سلف و نبدأ على نضافة و ما حدش يطلب مطالب طائفية و لا قوانين الا بعد ما تيجى حكومة منتخبة. و ياريت يتحط الشرط دة لأى مجلس انتقالى انة لا يسلق قانون ولا دستور الا لما ييجى مجلس منتخب

Fadi said...

كان زمان الاغنية بتقول "دولا مين ودولا مين دولا عساكر مصريين دولا مين ودولا مين دولا ولاد الفلاحين" وكان كل الناس فخورة بجيشها وبشرطتها أما دلوقت فلازم نغير الاغنية الى "دولا مين ودولا مين دولا شرطة اسرائيل دولا مين ودولا مين دولا عساكر اسرائيل"

biber boy said...

معاكى ..........

سمية صلاح مقلد said...

ايه الكلام الي كله خناق ده ..والاوفر تايم قبل ماتنامي بتتخانقي مع روحك في المراية بعد اهل الدار مايناموا!!المهم كلام جميل وحلوا من غير المراحيض والكنيف والتوليت

thirteenoclock said...

مشكلة المجلس العسكرى الان انه يمسك السلطة بالفعل و لذلك فهو غير قادر على القيام بانقلاب عسكرى و فرض الاحكام العرفية (حينقلب على نفسه؟ مينفعش!) اما اذا تولى الحكم جهة اخرى فيكون من الوارد الانقلاب عليها اذا فلتت منها الامور و هو ما يمكن افتعاله بسهولة .. " حتفرق في حاجة انتخابات من عدمها طول ما احنا تحت حكم عسكري" .. نعم حتفرق فى حاجة ! لو جاء مجلس شعب فيه اغلبية متماسكة تستطيع هذه الاغلبية ان تسحب بساط السلطة من مجلس عسكر غير منتخب عينه حسنى مبارك فى حين ان المجلس منتخب و ممثل للشعب صاحب شرعية يفتقدها مجلس العسكر .. اما القضاة فمثلهم مثل عصام شرف فى اى ازمة سيلجئون للعسكر و وجودهم فى السلطة يلقى بالمسئولية عليهم و يرفعها من على عاتق المجلس العسكرى الذى سيتعامل مع الازمة بمعرفته دون الرجوع اليهم و لكن من وراء قناعهم .. تسلم القضاة السلطة لن يمنع من اثارة الفتن خاصة اثناء الانتخابات و لن يغنى او يحد من نفوذ العسكر


الانتخابات هى الحل .. و والله العظيم تلاتة ما انا اخوان و لا سلافيين


من المسلم به انه لن يكون هناك شرعية الا لسلطة منتخبة كما انه لا يمكن اجراء انتخابات الا فى وجود سلطة امر واقع متماسكة

المشكلة الان ان الى كان ممسوك عليهم زلة مخالافات مالية تورطوا و اصبح كمان عليهم دم و ستصبح المواجهة اكثر شراسة و من ثم يثار التساؤل - هل يسمح هؤلاء بإجراء انتخابات ؟ - فى المقابل - هل يستطيع هؤلاء التهرب من اجرائها؟ .. يجب ان لا نسمح لهم بالتهرب من الاستحقاق الانتخابى مع التصوير ان ملهمش ذنب و مش بمزاجهم لان الشعب لن يشترك فى مواجهة ميدانية الا فى حال التهرب من الاستحقاق الانتخابى و مصادرة ارادته بشكل واضح

و فى النهاية يجب ان لا ننسى ان المجلس مجرد وكيل محلى للاحتلال الامريكى للمنطقة .. مازلنا نُحكم من جاردن سيتى و يجب توعية الناس بذلك .. نظام مبارك و الحزب الوثنى سقط و لكن نظام كامب ديفيد لم يسقط بعد و هو الان من يحارب للبقاء

و السلام على من اتبع الهدى

hardway said...

حقيقي..حقيقي..عبيطة اخر حاجة

ooonaaa said...

دبلومة التجارة الاليكترونية و التسويق الإليكترونى و التصدير والاستيراد
لخبراء التسويق الالكترونى والتجارة الالكترونية في العالم العربي
تعلم كيفية العمل من المنزل وتكسب مئات الدولارات بواسطة شبكة الإنترنت
كيفية تسويق منتجاتك وخدماتك بكل سهوله لجميع دول العالم
كيف تستخدم شبكة الإنترنت فى استيراد وتصدير المنتجات والخدمات
http://www.ect.ect2all.com

فافى said...

انتى اييييييييييييييييييييييييييييييييييييه انتى بتقولى على فتح السجون وترويع الامنين عمل ثورى وبتقارنينا بالثوره الفرنسيه ماتولع الثوره الفرنسيه يعنى هى كاتلوج لازم نمشى بيه ؟
انتى بجد مستفزه وكنت رجعت اقرأ لك بعد مقال صفوت حجازى تصدقى انا غلطانه انى دخلت على مدونتك تانى
انا بجد نفسى اشتمك يا شيخه
حسبى الله ونعم الوكيل فى الغباء
ومع ذلك هاقرالهم الفاتحه